Í dag hefst uppboð á fallegum handmótuðum kuðungsvasa úr smiðju leirlistakonunnar Melkorku Matthíasdóttur en hluti af upphæðinni sem safnast rennur til Ljóssins.
![](https://ljosid.is/wp-content/uploads/2023/01/Melkorka_Matthiasdottir_kudungur_til_styrktar_Ljosinu-300x225.jpg)
Kuðungurinn er handmótaður af leirlistakonunni Melkorku Matthíasdóttur
Melkorka vill að Ljósið njóti hluta upphæðarinnar en leirnum kynntist Melkorka fyrir alvöru þegar hún sat námskeið í Ljósinu eftir að hún greindist með brjóstakrabbamein fyrir 6 árum.
„Þessi kuðungsvasi sameinar margt í mínu lífi. Ammonítinn (steingervingur) vísar í jarðfræðina og um leið mína ævi. Harðger lífvera með þeim fyrstu hér á jörð og á lifandi afkomendur enn í dag, hefur því harkað af sér áföll og aldauða í jarðsögunni. Leirinn sem kuðungurinn er gerður úr vísar í uppbyggingaferlið mitt þar sem ég kynntist honum í Ljósinu í minni endurhæfingu eftir brjóstakrabbamein og náði að gleyma mér og finna flæðið. Að síðustu má nefna taðglerunginn utaná kuðungnum en hann vísar í námið mitt í Myndlistaskólanum í Reykjavík þar sem ég ákvað að ganga lengra, fylgja hjartanu og lærði að búa til glerunga og fann sameiningarkraftinn í listinni og jarðfræðinni.“ segir Melkorka.
Vasinn er brenndur með heimagerðum glerungi úr taðösku sem er fengin frá Reykofninum í Kópavogi en taðið er komið alla leið frá Langanesi og hefur verið þurrkað í heilt ár. Það er því sannarlega um einstakan hlut að ræða.
Hluti af andvirði vasans rennur sem áður segir til Ljóssins og mun uppboðið standa yfir til klukkan 18:00 miðvikudaginn 1. febrúar á Facebook síðu Leirlistar Melkorku. Kuðunginn má berja augum á sýningunni „Og hvað um tað“ sem fram fer í Listasal Mosfellsbæjar út vikuna.
Ekki er hægt að skilja eftir athugasemdir.