Sumarhandverk

Handverkssmiðjur og spilastundir sumarsins

Í sumar verða fjölbreyttar handverkssmiðjur og spilastundir, þar sem öll geta fundið eitthvað við sitt hæfi. Hægt verður að skrá sig með tveggja vikna fyrirvara beint í allar smiðjurnar og spilastundirnar. Ekki er þörf á skráningu í prjónahópinn á miðvikudagsmorgnum en mikilvægt er að skrá sig í allt annað. Ekkert hámark er á fjölda smiðja sem má sækja (fyrir utan leirlistarsmiðjurnar).

Hægt er að hlaða niður sumardagskránni í handverkinu hér.

Spilastundir í sumar
Á þriðjudögum verða spilastundir þar sem verða spiluð allskonar skemmtileg spil.

Leirlistarsmiðjur í sumar
Þær verða tvisvar í viku á mánudögum og fimmtudögum frá 10:00- 14:00. Tekin verður pása frá 12:00- 12:30. Eingöngu er hægt að skrá sig í eina smiðju í viku. Lagt er til að koma í að minnsta kosti í tvær leirlistarsmiðjur í sumar. Leiraðir eru munir í fyrri tímanum og í þeim síðari eru munirnir glerjaðir.

Hér að neðan má sjá meira um pop-up námskeiðin sem verða í sumar:

Vatnslitaflæði, hugleiðsla og eflandi ásetningur
– Mánudaginn 22. júní.
Við ætlum að vinna með aðferðir jóga nidra og sjálfseflandi sköpunar. Við munum vinna með ásetning – setningar tengdar samkennd og styrkleikum. Þær verða fléttaðar inn í jóga nidra hugleiðslu og svo unnið með þær á skapandi hátt með vatnslitum og skrifum.

Byrjendaspor í krosssaumi
– Miðvikudaginn 24. júní.
Í smiðjunni kynnumst við krosssaumi. Hver og einn velur sér litla mynd til þess að sauma.

Langar þig að læra að hekla tuskur horn í horn?
– Miðvikudaginn 1. júlí.
Ef þig langar að læra einfalda leið til þess að hekla tusku er þetta einmitt smiðjan fyrir þig! Gott er að kunna aðeins að hekla en einnig eru byrjendur í hekli velkomnir.

Alkóhólblek á kort og kerti
– Þriðjudaginn 30. júní.
Í smiðjunni leikum við okkur með alkóhólblek og skreytum bæði kort/merkimiða og kerti.

Þakklæti og sjálfið
– Þriðjudagana 7. júlí og 14. júlí.
Á námskeiðinu förum við aðeins inn á við og vinnum með sjálfsmynd og þakklæti á skapandi hátt. Búin verður til smábók sem geymir þau verkefni og æfingar sem verður farið í.

Saumaðu þinn eigin taupoka
– Miðvikudagana 8. júlí eða 15. júlí.
Í smiðjunni læra þáttakendur að sauma sinn eigin taupoka eftir sniði. Byrjendur sem og lengra komnir velkomin!

Blóm og útivera
– Þriðjudaginn 21. júlí.
Í dag hittumst við í Elliðaárdalnum við kaffihúsið, tökum smá göngutúr, týnum blóm og jurtir og njótum þess að vera úti.

Þurrnálaþæfing
– Miðvikudagana 22. júlí og 29. júlí.
Þurrþæfing leynir á sér og er skemmtilegt handverk sem hentar öllum. Endurtekning sem felst í þæfingunni er róandi og sköpunargleðin fær að ráða för. Með slíkri tækni er bæði hægt að breyta áður notuðu en líka búa til nýtt. Meðal annars er hægt að þurrnálaþæfa beint á föt, búa til skraut, listaverk og fígúrur. Komdu og prófaðu allskonar mismunandi aðferðir í þurrþæfingu!

Blómaprent
– Þriðjudaginn 28. júlí.
Í dag verðum við að hluta til úti, týnum blóm og jurtir og prentum þau svo á pappír sem hægt er að nota í kort, merkimiði, myndir og annað skemmtilegt.

Skemmtidagur fyrir Reykjavíkurmaraþonið
– Þriðjudaginn 11. ágúst.
Takið daginn frá. Nánari upplýsingar koma síðar!

Skráning fer fram í móttöku Ljóssins og í síma 561–3770. Einnig er hægt að senda tölvupóst á berglindgunnars@ljosid.is til þess að fá frekari upplýsingar eða koma vangaveltum á framfæri.