Samtalið heim

Við bjóðum þjónustuþega Ljóssins og aðstandendum þeirra hjartanlega velkomna á fyrirlestraröðina Samtalið heim.

Á þessum fyrirlestri í október verður sérstaklega fjallað um svefn og svefnvanda, með áherslu á praktísk ráð til að bæta svefnheilsu. Þá verður fjallað sérstaklega um áhrif krabbameina og krabbameinsmeðferða á svefn.

Á námskeiðum í Ljósinu hefur oft verið rætt hversu þarft og gott það væri fyrir þjónustuþega og aðstandendur að vera saman á fræðslu. Sérstaklega þar sem oft er erfitt að yfirfæra upplýsingar og upplifanir heim. Þegar tveir hlusta saman er einnig hægt að ræða fyrirlesturinn þegar heim er komið án þess að þurfa að endursegja hann.

Fyrirlestraröð fyrir ljósbera og aðstandendur þeirra. Fyrirlestrarnir eru síðasta mánudag hvers mánaðar.

Staðsetning er í húsnæði Ljóssins og verður fræðslunum einnig streymt í gegnum ZOOM.

Skráning fer fram rafrænt og í móttöku Ljóssins.

Temprun, Hrefna Óskarsdóttir iðjuþjálfi (30. nóvember)

Til að skilja hvað temprun snýst um er ágætt að ímynda sér líkamlega og andlega orku eins og rafhlöðu í farsíma. Ef þú tæmir batteríið algerlega þá þarftu að bíða með að nota símann á meðan hann er í hleðslu þar til þú getur notað hann aftur. Í veikindum er líkams-rafhlaðan pínu biluð og þá tæmist hraðar af henni heldur en það gerði áður. Temprun snýst um að ná jafnvægi milli orkunotkunar og endurhleðslu þannig að fólk geti gert sem mest af því sem skiptir þau máli og gefur lífinu lit.

Andhormónameðferð kvenna (innkirtlameðferð), Ólöf Kristjana krabbameinslæknir (25. janúar 2027)

Líkamleg og andleg líðan getur breytst mikið við að vera á andhormónum. Áhrifin geta verið fjölbreytt og mismunandi eftir einstaklingum og hafa sömuleiðis mismikil áhrif á aðstandendur og umhverfi þeirra sem lyfin taka. Í þessum fyrirlestri en rætt um ávinning og tilgang lyfjanna, andlegar og líkamlegar aukaverkanir og góð ráð við inntöku slíkra lyfja.