Fræðslunámskeið fyrir fólk með langvinnt krabbamein

Námskeið fyrir fólk sem er með langvinnt krabbamein.

Aðalmarkmiðin með námskeiðinu eru að þátttakendur auki jafnvægi sitt í daglegu lífi, virkni, vellíðan og von. Á námskeiðinu gefst tækifæri til þess að hitta aðra í sömu sporum, fá fræðslu og stuðning við að þekkja eigin tilfinningar og hugsanir. Einnig kynnum við leiðir til að efla sjálfsmyndina, draga úr þreytu og auka jafnvægi í daglegri iðju. Við skoðum áhrif veikinda á fjölskylduna og samskiptakerfi hennar og kynnumst slökun og árvekni.

Námskeiðið byggir á fræðslu, stuttum verkefnum, umræðum og slökunar/núvitundar æfingum.

Meðal þess sem fjallað er um á námskeiðinu er:

• Núvitund
• Aðlögun og skilningur á eigin líðan. 
• Sjálfsvinsemd og samkennd í eigin garð
• Þreyta og jafnvægi í daglegri iðju
• Samskipti og stuðningur
• Eigin gildi, tilgangur og von
• Upprifjun og úrvinnsla