Núvitundarnámskeið

Núvitund er færni sem getur aukið lífsfyllingu og skilning í eigin garð. Hún felst í því að taka eftir náttúrulegum eiginleika hugans til að vera meðvitaður hér og nú um það sem er að gerast meðan það er að gerast, án þess að grípa inn í og dæma það. Núvitund er þjálfuð m.a. með því að opna betur á og taka eftir; líkamsskynjun, tilfinningum, hugsunum og ytra umhverfi okkar. Með aukinni færni tengjumst við betur okkur sjálfum, öðrum í kringum okkur og umhverfinu.

Tilgangur með námskeiðinu er að finna betur fyrir orku núvitundar og þjálfa betur upp þína eigin færni til að vera með líðandi stund af aukinni meðvitund og ró.

Námskeiðið samanstendur af fræðslu og æfingum í núvitund og æfingum í innri og ytri samkennd og góðvild. Æfingarnar felast í stuttum sitjandi hugleiðslum, líkamsskönnun, og líkams- og gönguhugleiðslum. Einnig í því að viðra eigin upplifun af æfingunum ef fólk kýs, stundum í námskeiðshópnum og stundum í minni hópum. Tilgangur þess er að öðlast meiri skilning á eigin líðan og á upplifuninni, án þess þó að ráðleggja eða redda öðrum (ekki að fixa neitt), hver og einn er á sínum forsendum á námskeiðinu. Þátttakendurnir fá verkefni með sér heim til þess að æfa sig á milli tímanna, en formleg og óformleg ástundun heima fyrir getur stutt þig enn frekar við að tileinka þér æfingarnar og aukið þannig færni þína í núvitund. Á námskeiðinu færðu afhentan leiðarvísi og hljóðupptökur með núvitundaræfingum.
Rannsóknir sýna í vaxandi mæli að núvitund ýtir undir andlega og líkamlega vellíðan og auðveldar okkur að takast á við áskoranir og verkefni í lífinu. Þessi nálgun hefur verið notuð sl. áratugi í löndum í kringum okkur með góðum árangri.

Sólveig Hlín Kristjánsdóttir er sálfræðingur og núvitundar og samkenndarkennari.

Núvitund er það að vita hvað er að gerast innra með þér á meðan það er að gerast án þess að grípa inn í það – Rob Nairn