Líkamsrækt

Líkamsrækt er mjög mikilvæg fyrir fólk sem hefur fengið krabbamein og skiptir ekki máli á hvaða stigum sjúkdómurinn er, líkamsþjálfun hefur alltaf góð áhrif. Styrktar- og þrekþjálfun hjálpa til við hin ýmsu vandamál sem fylgja meðferð og er þessi listi ekki tæmandi:

• byggir upp vöðva
• styrkir bein
• styrkir hjarta og æðakerfið
• eflir ónæmiskerfið
• spornar gegn þreytu
• bætir lífsgæði og dregur úr þunglyndi
• hjálpar til við þyngdarstjórnun
• bætir sjálfsmynd og sjálfstraust

Hreyfing – heilsulind í Glæsibæ

Þrisvar sinnum í viku er boðið upp á alhliða þrek- og styrktarþjálfun þar sem sjúkraþjálfarar Ljóssins sjá um kennslu. Þeir sjá einnig um tækjakennslu í sal Hreyfingar ef þú vilt æfa á eigin vegum. Kennari á vegum Hreyfingar stýrir einum Bodybalance tíma á viku. Að auki býðst þér að fara í alla opna tíma á stöðinni, gufuböð og heita potta.
Kort í Hreyfingu og tímapantanir í tækjakennslu eru afgreiddar í gegnum Ljósið, nánari upplýsingar eru í síma 561-3770.

Tækjasalur Ljóssins

Vandamál eins og orkuleysi, hreyfiskerðing og aðrir fylgikvillar geta komið upp í kjölfar meðferðar. Við viljum mæta þessum vandamálum og bjóða aukna þjónustu í notalegu umhverfi Ljóssins, þar sem um er að ræða lítinn tækjasal og sérhæft starfsfólk.
Umsjón með tækjasal hafa sjúkraþjálfararnir Fjóla Dröfn Guðmundsdóttir, G. Haukur Guðmundsson og Margrét Indriðadóttir.

Kennsla í tækjasal

Ljósið býður upp á kennslu í tækjasal. Í tímanum er farið yfir rétta líkamsbeitingu við styrktarþjálfun og stillingu á tækjum. Sjúkraþjálfarar Ljóssins sjá um kennsluna og panta þarf tíma hjá þeim. Hver og einn fær áætlun sem hann/hún vinnur markvisst í til þess að viðhalda/bæta líkamlegt atgervi.

Tímar fyrir ungt fólk

Við bjóðum upp á tíma í tækjasal fyrir ungt fólk sem vill auka þrek og þol undir leiðsögn sjúkraþjálfara. Markmiðið er að fólk á svipuðum aldri hittist og fái þannig hvatningu og stuðning til að efla líkamshreysti.

Tímar fyrir karla

Tvisvar í viku er boðið upp á æfingatíma fyrir karla sem vilja stunda sína endurhæfingu í góðum félagsskap undir leiðsögn sjúkraþjálfara.

Tímar fyrir konur

Tvisvar í viku er boðið upp á æfingatíma fyrir konur sem vilja stunda sína endurhæfingu í góðum félagsskap undir leiðsögn sjúkraþjálfara. Annars vegar er um hóp brjóstakrabbameinskvenna að ræða og hins vegar konur með ýmis konar krabbameinsgreiningar.

Helstu upplýsingar

Styrktarþjálfun, hópleikfimi, þrekþjálfun.

Staðsetningar: Tækjasalur Ljóssins og Hreyfing í Glæsibæ.

Umsjón með tækjasal: Fjóla Dröfn Guðmundsdóttir, G. Haukur Guðmundsson og Margrét Indriðadóttir, sjúkraþjálfarar